Vergangene Veranstaltungen
Alpgottesdienst Tierhag
Nach langem warte hemmer euse Probebetrieb wieder dörfe uf näh, was eus sehr gfreut hett. Vieli Mäntig sind verstriche wommer, z Abig, nöd gwüsst hett, was mer söll tue. Dä letschti Uftritt, isch euse Jodlerabig im Januar gsi, und nachmene baldige Uftritt, hetts nöd usgseh. Umso meh hemmer eus gfreut, dass mer, es wiiters Jahr,  hend dörfe dä Alpgottesdienst im Tierhag Steg, mitgestallte. Es isch en freudige Alass gsi, au dank em volle Festzelt. Mir danked dä Familie Walker, vom Restaurant Tierhag, für ihri müeh und Gastfründschaft.
Unterhaltung 2020
"En rüüdig schönä Abig"
$Chum ischs Jahr 2019 verbi, staht bi eus Baumerjodler scho t Jodlerunterhaltig i dä Altlandenberghalle z Bauma vor dä Tür. Under em Motto "Bärnerabe" hemmer das Jahr Lieder usschliesslich us dä Federe vo Berner Komponiste dörfe zum beste gäh. Mit em Jodelquartett Männertreu Teuffenthal am Samstig isch s Programm bestens erwiiteret worde. Dä goldiger Örgeliblitz hett bis zur spaater Stund no öpe es Päärli zum tanze chöne fessle und a dä Lutzbar isch bis it Morgestunde no so mängs Lied und Witzli z ghöre gsi. Mit originale Kemmeribode Meringues hett sich s Motto au bim Dessert wiedergspieglet. Am Sunntig Mittag hemmer, wenn au nümme ganz i voller Bsetzig, da sich bi dä einte bösi Verchältige igschliche hend, euses Programm wiederum vor mene voll bsetzte Saal uffüehre. I dä Pause hett mer glich wie am Vorabig chöne Tombolalösli kaufe und uf en schöne Priis vom "Gabetempel" oder es guets Stuck Fleisch hoffe. Im zweite Teil hett eus t Theatergruppe Ried dä Einakter "D Geischter vom Lidenhof" präsentiert..


© Copyright www.baumerjodler.ch